一級半笑話之『細Ｂ談政治』

以下故事不記起在何處看見，現僅憑些微記憶重新整理。
（故事內容純屬虛構，如有雷同，實屬考合）😅


　　　九歲大「細Ｂ」問老竇，乜嘢叫做政治。老竇話：「乖仔，聽住啦，我賺錢養家，就係家中嘅『資本家』，你阿媽攞住我尐錢，全權使用，就係『政府』，你由我哋照顧，就係『人民』，菲傭煮飯買餸，就係『工人階級』，你嘅半歲大細佬，重食緊奶，佢就係我哋嘅『前途』或者『希望』，每個地方都分資本家、政府、工人、人民、前途，你明白未呀？」

　　細Ｂ聽後似懂非懂，但都叫做多咗尐了解。到咗三更半夜，佢畀細佬嘅喊聲嘈醒，於是行埋去睇睇，正所謂唔睇重猶自可，一睇就發覺大鑊，原來細佬賴屎賴尿，成塊紙尿片都濕晒，唯有拿拿林走去搵阿媽，點知阿媽熟睡如泥，好似隻死豬咁，但就奇怪唔見咗阿爸，都唔知佢走咗去邊，此時唯有走去工人房搵菲傭幫忙。點知去到，只見房門半掩，拍門又冇人應，於是就伸個頭入去裝裝，竟然見到老竇嚮菲傭張床上面，仲騎住菲傭係咁郁，但就唔知佢地嚮度做乜。

　　第二朝，細Ｂ食早餐時，見阿媽重未醒，就對老竇話：「我而家終於明白乜嘢叫做政治嘞」，老竇好開心咁話：「乖仔，講嚟聽吓」，細Ｂ就話：「當前途有難，攪到一褲都係嘅時候，人民就四出奔走呼號，但就無人理睬，因為政府淨係掛住瞓覺，唔做嘢，而資本家就一於要騎喺工人頭上，就算係幾夜都要繼續剝削！」

　　欲知後事如何，請看『細Ｂ談政治』下集大結局！

一級半笑話之『細Ｂ談政治』下集
http://kentseky.blogspot.hk/2006/03/blog-post_2604.html